أكتب رؤيتك


قبل يومين قريت رؤيتي في سنة ٢٠١٩ والأشياء الي كنت اطمح أحققها.


كانت فوق الثلاثين هدف ابي اوصل لهم.


في شغلات ما وصلت لها وفي شغلات تحققت ولكن المفاجئة..! واحد من هذه الطموحات ان أمثّل في السينما.


وما كانت عندي خطة لهذا الهدف ولا يوم من الأيام مثلت.


بس في داخلي ابي أخوض هذه التجربة لان راح تزيد ثقتي بنفسي واتحدى نفسي في مجال جديد علي.


هذا الحلم مو بس تحقق ولكن مثلت مع نجوم كبار عمري ما فكرت أشوفهم بالحقيقة.


كان شرف كبير لي وتجربة لا يمكن أنساها.


المخرج محمد الحملي شاف فيني شي يمكن ما اعرف شنو هو للحين لكن عطاني الثقة والدعم والحمدلله طلعت في فيلم #النهاية


مع قرب نهاية السنة في أهداف اطمح أحققها ولكن الي ودّي أشاركه معاكم هو إن لازم تكتب رؤيتك للسنة القادمة او الست اشهر القادمين او الثلاث اشهر القادمة او الشهر القادم.


اذا كتبت الي تبي تسويه وتتطلّع عليه بعد سنة راح تنصدم من إنجازاتك.


خل أهدافك اكبر من ما تعتقد وأسعى بلى تخوّف.


والاهم دايما خطط للأمام ولا تعيش يومك فقط من غير هدف.

بقى فقط شهرين على نهاية السنة!


هل راح تكون صحّي أكثر؟ هل راح تتغيّر للافضل؟ هل راح تساعد ناس اكثر؟


إكتب ✏️

GROUP TRAINING - PERSONAL TRAINING - NUTRITIONAL ADVICE - WEIGHT LOSS - STRENGTH TRAINING - CORE STRENGTH - PREHABILITATION - SPEED TRAINING

  • YouTube - TFW KUWAIT
  • White Instagram Icon
  • w-facebook
  • Twitter Clean

© 2019 TFW KUWAIT.